Mu gihe habura ibyumweru bitatu ngo shampiyona y’icyiciro cya kabiri itangire, amakipe atandukanye akomeje imyitozo anakina imikino ya gicuti itandukanye.
Nkombo Stars yahoze Ari ivoire olyampique yanganyije na AS Muhanga 1-1 mu mukino wabereye kuri Stade ya Muhanga kuri uyu wa kabiri tariki 3 Nzeri 2024.Wari umukino wa kabiri iyi kipe ikinnye mu munsi umwe kuko mu masaha ya mu gitondo yari yabanje gukina na Police FC kuri Kigali Pele Stadium, banganya 3-3.
AS Muhanga yabanje mu kibuga ikipe yayo ya kabiri, mu gice cya kabiri ikoresha ikipe ya mbere. Nkombo Stars izakina icyiciro cya kabiri nyuma yo kwegukana ikipe ya Ivoire Olympique. Iyi kipe iterwa inkunga na Marchal Real Estate, kompanyi yubaka amazu ikacuruza ibibanza mu Mujyi wa Kigali no mu nkengero zayo nko mu karere ka Bugesera.
Muri tombola yabaye uyu munsi, Nkombo Stars yisanze mu itsinda rya mbere ririmo Etoile de l’est, Akagera FC, Aspor FC, Esperance Sport Club, Addax Sports Club, Gasabo United, Impeesa FC, Intare FC, Nyagatare FC, La Jeunesse FC , Alpha FC na City Boys.
AS Muhanga yo iri mu itsinda rya kabiri ririmo Sunrise FC, Gicumbi FC, Miroplast, Nyanza FC, Kamonyi Ventures, Sina Gerald, United Stars, Tsindabatsinde, Vision Jeunesse Nouvelle, UR FC, Interforce FC na Motard FC.
Biteganyijwe ko shampiyona y’icyiciro cya kabiri izatangira tariki 21 Nzeri 2024.
Mugeni Oddy
